::SELAMAT HARI GAWAI 2012::

Selamat Hari Gawai ngagai semua bala kaban belayan ti ngelala aku ba ditu serta dini dini endur….

Besemangat meda bala udah bepun ke bepesan enggau pangan diri ke pengelantang ke taun baru ila. Sama sama meh kitai besampi, awak ke pengidup kitai betambah lantang, tubuh kitai majak gerai, anak kitai mejak pintar ba sekula serta kitai empu majak ransing ati ngemaju ka pengidup diri.

Maya ari Gawai taun tu, jaga manah meh ulah diri empu. Enti ulih nagang diri, anang kelalu bendar ngirup ai bisa sampai mabuk enggai ke ulah kitai maya mabuk enda manah dipeda urang. Enggai ke berekat Petara enda lekat enti nyema kitai berulah ke enda manah ba ari ti manah nya.

Anang enda ingat ke tuju sebenar ya hari Gawai tu disambut ianya kena kitai beterima kasih ngagai Petara aki ini kitai laban udah meri kitai bulih pemisi ba taun ti udah sereta minta berekat ngambi ke bulih pemisi ti lebih ba taun ti deka datai. Nya tuju ya ti bendar.

Parti pun parti mega, rami pun rami mega tang anang enda ingat ke pengawa sehari hari. Enti kitai bini urang, indai urang, anang kelalu bendar begagai betundi sampai pemakai laki enggau anak enda dikenati ka. Enti kitai laki tauka apai urang, anang enda ingat bejaga ke ruang bilik diri empu, perangai udah ngirup anang enda dijaga enggai ke nyadi chunto ke enda manah ba bala anak kitai.

Temuai ti datai, anang enda ngenah ke pemakai ke manah manah. Munyi ko ibu ku lemai kemari, maya gawai patut ya makai utai ke manah manah, anang majak ke mabuk , utai diempa nadai di nah ke temuai serta bala anak ke gawa ba menua jauh, mulai kediri ke menua tang meh nyu ngintu diri laban apai indai tembu telentang mabuk.

Maya gawai, maya kitai begempuru diri sebilik, makai semija. Bala ti bisi pengarap, besampi begulai enggau bala diri sebilik awak ke bulih berekat ti lebih.

Tuak maya Gawai ukai semesti iya kena kitai ngemabuk Kediri tang tuak tu tanda pemali kena kitai nanda taun baru, besampi ngagai Petara aki ini kitai, ai pengayu ko kitai.

Bebuti enggau pangan diri anang kelalu, enggai ke nyu ngemedis ati kaban. Enggai ke meri chunto ke enda manah ngagai urang luar sereta pengabang ti datai. Belaya, berekak sama diri anang sekali. Pia mega enggau melaki bini. Anang ngamah ari ti paling berekat ba dalam taun kitai Iban enggau utai ti enda manah.

Anang ngasuh urang luar meda chara pengidup kitai ti enda betul, kitai bansa Iban, bansa ti beradat sereta mereti. Nya ti patut dibantai ke kitai. Bantai ke pengawa kitai ti meruan, ajat ti manah, tabuh ti nyamai didinga. Nya utai ti patut dipeda urang ba kitai.

Kena nutup pesan Gawai tu, sekali dak aku meri ucap

“SELAMAT ARI GAWAI TAUN 2012, 

NGAJIH SERETA BESAMPI KE PEMUJUR PENGIDUP SEMUA KITAI.”